Skipan sveitarfélaga, samvinna þeirra og lýðræði

Sveitarfélög eru oftast sameinuð í þeim megintilgangi að skapa
stærri einingar og ná þannig fram aukinni rekstrarhagkvæmni og
bolmagni til að bjóða upp á aukna og betri þjónustu. Fækkun og
stækkun sveitarfélaga getur leitt af sér lýðræðishalla með ýmsum
hætti. Það er mikilvægt að hafa þetta í huga eftir sameiningar og
hafa jafnræði milli svæða í heiðri við skipulagningu stjórnsýslu og
þjónustu.
Þátttaka í samstarfsverkefnum með öðrum sveitarfélögum
felur í sér framsal á valdi kjörinna fulltrúa sveitarfélags til þess
vettvangs ákvarðanatöku sem tengist hverju samstarfsverkefni.
Hafa verður í huga að sé sveitarfélag aðili að mörgum og stórum
samstarfsverkefnum, getur verulegt vald verið framselt til
annars vettvangs en kjörinn var í sveitarstjórnarkosningum. Við
slíkar aðstæður geta vaknað spurningar um tilgang og hlutverk
viðkomandi sveitarstjórnar.