Description
Erindið fjallar um niðurstöður rannsóknar á samstarfi Menntafléttunnar og Íslenskuþorpsins um fagtengt íslenskunámskeið fyrir leikskólastarfsfólk. Menntafléttan er röð starfsþróunarnámskeiða sem byggja á nánum tengslum starfsþróunar við daglegt starf og ígrundun. Aðferðafræði Íslenskuþorpsins byggir á því að starfssamfélagið og mentorar styðja við íslenskunám þátttakenda á fjölbreyttan hátt. Markmið rannsóknarinnar var að kanna viðhorf þátttakenda, leikskólastjóra og mentora til námskeiðs sem fór fram veturinn 2022-2023. Þátttakendur lýstu viðhorfum sínum í námsígrundunum en leikskólastjórar og mentorar svöruðu viðhorfskönnun í lok skólaársins. Viðtöl voru tekin við leikskólastjóra og mentor á höfuðborgarsvæðinu til að kanna áhrif námskeiðsins á lærdómssamfélag leikskólans. Niðurstöður leiða í ljós að þátttakendum fannst námskeiðið krefjandi en lærdómsríkt og sjálfstraust þeirra jókst í bæði leikskólafræðum og íslensku. 76% leikskólastjóra og mentora merktu aukna íslenskunotkun í samskiptum við börnin og 73% urðu vör við töluverðar eða miklar framfarir þátttakenda í íslensku. Draga má þann lærdóm af niðurstöðunum að aðalverkfæri Menntafléttunnar, þróunarhringur með áherslu á stöðuga ígrundun í samtali jafningja, henti vel sem umgjörð um fagtengd íslenskunámskeið í leikskólum. Álykta má að fræðilegar undirstöður Íslenskuþorpsins um máltileinkun, þar sem höfuðatriði er að tala við einhvern sem kann meira í nýja málinu og að tungumálanámið fari fram í samhengi við aðstæður, henti vel sem umgjörð um íslenskunám fyrir leikskólastarfsfólk með fjölbreyttan tungumála- og menningarbakgrunn. Niðurstöðurnar hafa mikið gildi fyrir leikskólavettvanginn. Þær varpa ljósi á raunhæfa leið til starfsþróunar hjá ört stækkandi hópi í starfsliði leikskóla og draga einnig fram hve mikilvægt er að samverkafólk þátttakenda taki höndum saman um stuðning við íslenskunám á starfsstað.| Period | 29 Sept 2023 |
|---|---|
| Event title | Menntakvika 2023: Ráðstefna í menntavísindum |
| Event type | Conference |
| Conference number | 2023 |
| Location | Reykjavík, IcelandShow on map |
| Degree of Recognition | National |